Тудор се пожали: Вакво нешто не сум видел никогаш претходно во кариерата!

Хрватскиот тренер Игор Тудор ја одржа својата средба со новинарите пред неделниот дуел на неговиот Тотенхем со Ливерпул, во момент кога клубот води битка за опстанок во Премиер лигата. По четири последователни порази под негово водство, иднината на хрватскиот тренер е неизвесна, а тимот е само еден бод над линијата за испаѓање.

Тудор пред ова тешко гостување не може да смета на неколку клучни играчи. Кристијан Ромеро и Жоа Палиња се надвор од игра поради протоколот за мозочен удар откако дел од тимот се судрија со глави за време на поразот од Атлетико Мадрид во Лигата на шампионите. Покрај нив, недостапни се и Мики ван де Вен, како и Ив Бисума, кој исто така има проблеми со повреда, додека Конор Галахер има треска, иако во клубот се надеваат дека ќе биде подготвен.

“Секогаш нешто се случува. Многу е ретко, никогаш вакво нешто не сум видел во мојата кариера”, изјави Тудор за состојбата со отсутни играчи. Единствената добра вест е дека Дестини Удоги е речиси целосно закрепнат, и неговото враќање се очекува за наредниот натпревар против Нотингем Форест.

Запрашан за тешката ситуација во која се наоѓа тимот, Тудор им испрати јасна порака на играчите. “Тешко е, секако. Не само поради последниот натпревар, туку поради целиот овој период. Не е лесна ситуација, не ни е лесен моментот. Голем е предизвикот да се променат работите”, рече Тудор и дополни:

“Како и во сè во животот, можете да изберете како ќе гледате на ситуацијата. Можете да плачете или да се борите. Можете да бидете жртва или да направите нешто да се промени. Таа е пораката што ја пренесов на играчите. Чашата е полупразна или полуполна. Тие кои храбро се соочуваат со промените, ќе станат подобри луѓе и играчи. Реков дека се работи за сите нас, а не за сите тие глупости.”

Спарс во недела гостуваат на Енфилд, стадион од каде традиционално тешко носат бодови. Ситуацијата дополнително се комплицира со фактот што тие се само бод пред Вест Хем на 18-то и Нотингем Форест на 17-то место. Нивните противници во борбата за опстанок овој викенд ги играат своите натпревари на свој терен. Вест Хем во сабота ја пречекува екипата која се бори за титулата, Манчестер Сити, додека Нотингем Форест во недела се соочува со Фулам.