Срамота: Тренер во Италија удираше и шамараше девојка од 17 години

Во неделата од Италија доаѓа многу вознемирувачка и грда вест. На натпревар од аматерската лига за младинци, тренерот на Ѓованету од Сарока неколку пати ја удри помошната судијка – девојка од 17 години!

Натпреварот помеѓу Нуова Ла Сале и Ѓованету Сарока се одигра на 28 февруари во Сардинија како дел од аматерската лига за играчи до 17 години.

Една од помошните судии била девојка од 17 години и неа физички ја нападна гостинскиот тренер, маж од околу 50 години.

Сè започна кога беше досуден аут за домашниот тим. Гостинскиот тренер прво ја навредуваше линиската судијка, а кога беше исклучен, повторно се врати на теренот и, како што се наведува, три пати ја удри девојката со шамар, а потоа ја удри и со тупаница.

Случајот, секако, веднаш стигна пред надлежните органи и тренерот доби суспензија на пет години.

„Неприфатливо е да се толерира насилство кон судиите, особено кога жртвите се млади судии. Судиската организација на Италија бара ваквите случаи да се казнуваат најсилно и во целата фудбалска организација да се заземе јасен став – насилството нема место на нашите терени.

Насилството кон официјалните лица на натпреварот е срамотно и директно ги крши принципите на почит и фер-плеј, кои се основа на спортот.

Пример треба да поставуваат оние кои се на одговорни позиции – тренерите, менаџерите, родителите и навивачите. Тие кои во спортот имаат улога на учители и едукатори мора да носат морална и човечка одговорност за да ги усвојат овие принципи сите.

Стоиме солидарно со нашата млада колешка на која и испраќаме поддршка и разбирање“, велат од Судиската организација.