Решено е: Само Лапорта и Фонт се официјални кандидати за претседател на Барселона

По проверката на потписите, Изборната комисија на Барселона ги објави кандидатурите за претседателските избори. Единствено поранешниот претседател Жоан Лапорта и неговиот противник Виктор Фонт ја собраа потребната поддршка за да учествуваат на изборите на 15 март.

Тие ќе бидат единствените двајца кандидати кои ќе се борат за претседателската функција на Барселона на изборите. По соодветната нотарска проверка на потписите, каталонскиот клуб објави дека и двајцата го поминаа прагот од 2337 потребни потписи и се објавени за официјални кандидати од Изборната комисија.

Во понеделник, поранешниот претседател на „Блаугранас“ претстави 8170 потписи, од кои 7226 беа валидни, при што 11,55% од нив беа отфрлени. Лидерот на движењето „Nosaltres“ и главниот противник на Лапорта, Виктор Фонт, достави вкупно 5144 потписи, од кои 4440 беа одобрени, со 13,69% невалидни.

За разлика од нив, третиот кандидат – Марк Сирия, не успеа да собере потребната валидна поддршка за да се кандидира, иако во понеделник претстави 2844 потписи. Изборната комисија беше исклучително строга при проверката на податоците во секое избирачко ливче, кое мораше да содржи код и број на членска карта, како и потпис и фотокопија од валидна лична карта.

По објавувањето на кандидатурите, Жоан Лапорта и Виктор Фонт ќе ја започнат својата кампања овој петок, која ќе трае до 13 март, два дена пред одржувањето на изборите. Фонт сакаше изборите да бидат своеобразен референдум против Лапорта и сега ќе ја има можноста да се соочи лице в лице со поранешниот претседател во битката за функцијата.

На претходните избори во 2021 г. и двајцата беа меѓу кандидатите за претседател, при што тогаш Лапорта победи со малку над 54% од гласовите.