Флик: Во Барселона не инвестираме многу пари, но носиме правилни одлуки

Откако во минатото коло на Ла Лига долгата успешна серија на Барселона беше прекината, сега шампионите ќе се обидат да запишат нова победа.

Во недела тимот е домаќин, а противникот изгледа идеален за таа цел – Овиедо, кој е последен на табелата. Еве што изјави тренерот на Барса Ханзи Флик по низа теми на редовната прес-конференција:

Изборите за претседател на клубот
Претседателот разговараше со мене. Добра вест е што изборите ќе бидат во најкраток можен рок. Тоа не влијае на тимот – ние сме професионалци, треба да играме фудбал, да имаме успеси… Ќе се фокусираме на нашите обврски и секогаш ќе настапуваме на максимум.

Односите со Жоан Лапорта
Мислам дека во последната година и пол имаше многу промени на подобро. Не инвестираме толку многу пари, но носиме правилни одлуки во врска со играчите што доаѓаат и им даваме можности на фудбалери од „Ла Масија“ да се развиваат и напредуваат. Ова е многу добра ситуација. За клубот е важно да има стабилност. Ќе видиме што ќе се случи. Членовите го избираат иднината на клубот и се надевам дека ќе тргнеме во правилна насока.