Габриел Жезус е подготвен да се врати по 332 дена надвор од терените

Габриел Жезус може да го одигра својот прв натпревар за Арсенал по пауза од 332 дена, откако патуваше со своите соиграчи до Белгија за мечот од основната фаза во Лигата на шампионите против Бриж.

Жезус е надвор од игра, откако ја скина предната вкрстена врска на левото колено при поразот на “топчиите” против Манчестер Јунајтед во меч од третото коло на ФА Купот на 12 јануари.

Од лондонскиот клуб потврдија дека 28-годишниот напаѓач веќе е регистриран во составот за натпреварите од Лигата на шампионите. Тој го зазема местото на Макс Дауман, кој се здобил со повреда на зглобот, играјќи за Арсенал до 21 година минатиот викенд.

Бразилецот Жезус беше неискористена резерва при ремито 1:1 на Арсенал со Челси минатиот месец и при следната домашна победа со 2:0 над Брентфорд во Премиер лигата.