Гвардиола откри што му кажал на Халанд по жестоката расправа по победата (Видео)

Пеп Гвардиола ја откри позадината на жестокиот разговор со Ерлинг Халанд кој следеше веднаш по драматичната победа на Манчестер Сити против Лидс Јунајтед со резултат 3:2. Додека Граѓаните ги прославуваа важните три поени, норвешкиот напаѓач остана чекор подалеку од својот 100-ти гол во Премиер лигата, што очигледно предизвика фрустрации, пишува „Goal.com“.

По два последователни порази, од Њукасл во првенството и Баер Леверкузен во Лигата на шампионите, Сити се враќаа на победничките патеки. Се чинеше дека се на добар пат откако поведоа со 2:0 со головите на Фил Фоден и Јошко Гвардиол, но Лидс се врати во игра со головите на Доминик Калверт-Луин и Лукас Нмече.

Сепак, победата ја осигураа домаќините благодарение на вториот гол на Фоден во првата минута од судиското надополнување, пробивајќи се низ одбраната и совладувајќи го голманот Лукас Пери. Со оваа победа екипата на Пеп Гвардиола се искачи на второто место на табелата, со четири поени заостанување зад водечкиот Арсенал, кој денес игра против третопласираниот Челси.

За Ерлинг Халанд ова беше попладне за заборавање. Најдобриот стрелец на лигата со 14 гола во 13 натпревари го одигра целиот меч, но не успеа да ја затресе мрежата на Лидс, клуб од неговиот роден град каде што неговиот татко Алф Инге играше од 1997 до 2000 година. Неговата потрага по јубилејниот 100-ти гол во Премиер лигата така беше одложена.

Очигледно разочаран, Норвежанецот по последниот свиреж влезе во напната расправа со Гвардиола. Откако го изнел своето мислење, поранешниот напаѓач на Борусија Дортмунд се обидел да си замине, но менаџерот на Сити двапати го прегрнал, исто желен да ги изрази своите чувства. На крајот разговорот завршил со насмевки на лицата на двајцата.

Менаџерот на Сити подоцна откри за што разговарал со својот најдобар стрелец. За „BBC Sport“ изјави: “Ќе го постигне [својот 100-ти гол] во следниот натпревар. Само разговаравме за одморот. Тој има големо тело. Минутите, минутите, во тој момент сте свежи. Одмор [не е] само за нозете [покажувајќи на главата]. Не е како Фил или Жереми [Доку], тие можат да се одморат. Ерлинг е голем човек. Толку ни е потребен”, објасни Гвардиола.

Халанд и Пеп имаа долга пост матч дискусија pic.twitter.com/dJ4GFwfIRT

— Гвардиолита (@rodrisonfire_16) 29 ноември 2025