Jувентус го победи Бодо, па „смрзна“ во Норвешка: Не може да се врати во Италија!

Фудбалерите на Јувентус се враќаат дома со победа од натпреварот против Боде во Норвешка. Но, по завршување на средбата, нивното патување се претвора во вистински предизвик бидејќи временските услови го кочат авио-сообраќајот на овој дел од континентот, и не е јасно кога ќе се вратат во Италија Дуко Влаховиќ и останатите членови на екипата.

Големите студови и замрзнувањето го отежна враќање во Торино. Оваа ситуација може дополнително да им ја комплицира подготовката за претстојниот дуел во првенството против Каљари.

Според извори од италијанските медиуми, тимот на Јувентус ја помина ноќта во Норвешка со план да полетаат за Торино денеска на пладне, по локално време, но сега тоа е неизвесно поради снежните и замрзнати услови што утрово се случија во Боде.

Посебна ситуација се јавува на локалниот аеродром, каде што пистата е силно замрзната, поставувајќи прашање дали тимот задолжен за расчистување навреме ќе ги совлада проблемите.

Како што пренесува „Газета спорт”, високите претставници на клубот, Дамијен Комоли и Џорџо Киелини, на денот на натпреварот, биле принудно преземени до Шведска, од каде потоа патувале со автомобил кон Норвешка.

Весникот известува и дека околу 1.000 патници се заглавени на аеродромот, чекајќи нормализирање на летовите.

Среќна околност за Јувентус е што следниот натпревар ги чека в сабота во 18 часот токму во Торино, што значи дека ќе избегнат дополнителниот пат до Сардинија и можните перипетии поврзани со тоа.