Борг: Ѓоковиќ е најдобар во историјата, Федерер и Надал го делат второто место

Да играше колку другите најголеми асови, Бјорн Борг можеби денес ќе беше најголемиот шампион на сите времиња. Но не играше, а тоа не го спречува искрено да каже кој за него е најдобар во историјата.

– Новак Ѓоковиќ е најголемиот што некогаш играл оваа игра – рече во интервју за „Скај ТВ“ – Роџер Федерер и Рафаел Надал го делат второто место. Неверојатно е како Ѓоковиќ игра на 38 години. Многу сум импресиониран.

Борг последните денови дава многу интервјуа затоа што е во тек кампањата за промоција на неговата автобиографија.

Швеѓанецот знае кој е најголемата цел на Новак до крајот на кариерата.

– Знам дека сака да го освои 25-тиот гренд-слем, но ќе му биде многу тешко со Карлос Алкарас, Јаник Синер и останатите од врвот. Сепак, мислам дека може да успее. Се надевам дека ќе може да игра барем уште една година.