Пикси ќе стане минато: Мурињо би можел да ја спасува Србија!?

По дебаклот против Англија, во Србија владее вистински очај, никој не го посакува Драган Стојковиќ Пикси на клупата, а веќе се бара кој би можел да го наследи во наредниот период.

И додека Фудбалскиот сојуз на Србија не планира да му го сврти грбот на својата легенда, навивачите и речиси сите медиуми посакуваат што побрза промена, а порталите почнаа со анализа кој би бил најдоброто решение за жешката клупа.

Стојковиќ има договор до летото 2026 година, прашање е дали ќе го одработи до крај, бидејќи следуваат многу важни натпревари за крај на квалификациите, вклучувајќи ја и онаа со Албанија која е на програмата во октомври.

Меѓу слободните се наоѓаат Јоахим Лев, кој во 2014 година беше со Германија светски првак и кој веќе четири години не води никого. Фудбалскиот сојуз на Србија наводно го контактирал минатата година. Покрај него, тука е и Јирген Клинсман, поранешен селектор на Германија, САД и Јужна Кореја.

Без договор се и Лучано Спалети и Тиаго Мота, кои добија откази од страна на Фудбалската федерација на Италија и Јувентус.

Постојат и нереални опции како што се Чави, Жозе Мурињо, за кои треба “брдо пари”, а интересно е што се спомнуваат и Вахид Халилхоџиќ, и Един Терзиќ, кои се слободни. Проверени стручњаци се, но исто така изгледаат како невозможна мисија.