Италијанскиот ветеран жестоко го критикуваше Влаховиќ: Се однесува како крал, а ништо не прави!

Српскиот напаѓач Душан Влаховиќ се најде под жестока критика од поранешниот италијански репрезентативец Антонио Касано.

Антонио Касано е познат по своите остри коментари за фудбалските случувања во Италија. Душан Влаховиќ беше честа тема на неговите дискусии, тврдејќи дека е преценет.

Касано се осврна на прославата на головите на Влаховиќ на почетокот на сезоната. Како резервист, постигна два гола и потоа ги рашири рацете.

Таквиот начин на славење никако не му се допадна на Касано, кој го нарече промашување.

“Влаховиќ не си замина, а Јувентус го користи бидејќи мислат дека така мора. Му прават услуга”, истакнува Касано и продолжува:

“Влаховиќ испадна проблем на Јувентус бидејќи рече ‘Јас останувам овде’. Видете само какви изјави дава…”

“Доведен беше за огромни пари и добива огромна плата, а веќе три години игра лошо. Сега даде два гола, па се однесува како цар. Всушност е промашување. И уште секој месец му тече плата.”

Душан Влаховиќ во јануари 2022, пристигна од Фиорентина за 84 милиони евра. Во дресот на Старата дама досега настапи 147 пати, со 60 гола и 14 асистенции.