Tи благодариме за магијата: Се пензионира еден од најдобрите футсал играчи во историјата!

Легендарниот Рикардо Филипе да Силва Брага, познат како Рикардињо, ја заврши својата неверојатна кариера.

Тридесет и деветгодишниот виртуоз во малиот фудбал објави дека се пензионира на конференција организирана од Португалскиот фудбалски сојуз.

„Ова беше најтешката одлука што сум ја донел во животот. Телото и умот кажаа доста. Подобро е да се напушти спортот пред тој да те напушти тебе,“ изјави тој.

Рикардињо беше прогласен за најдобар играч на футсалот во светот шест пати, што е рекордно, според специјализираниот портал Футсал Планет.

Кариерата ја започна со Миремар, а славата ја постигна во Бенфика. Подоцна играше за Нагоја (Јапонија), московскиот ЦСКА, Интер Мовистар (Шпанија), АЦЦС (Франција), Пендецар Јунајтед (Индонезија), Рига (Латвија) и Екосити Генцано (Италија), освојувајќи вкупно 43 трофеи, меѓу кои три Лиги на шампионите.

За репрезентацијата на Португалија одигра 188 натпревари и постигна 142 гола, освојувајќи Светско (2021) и Европско првенство (2018).

„Мојот сон секогаш беше да бидам амбасадор на овој спорт, а за мене тоа значи да го пренесам футсалот во сите краишта на светот,“ изјави Рикардинјо.