Шешко поблизу до Јунајтед, Њукасл надвор од играта?

Не е тајна дека Њукасл го пројави својот интерес за Бенјамин Шешко, но офанзивата на Манчестер Јунајтед ги комплицира плановите, пишува Гол. Црвените Ѓаволи летово веќе ги донесоа Матеус Куња и Брајан Мбеумо, а новите информации сугерираат дека Шешко е клучна фигура во нивните идни планови.

Ако словенечкиот напаѓач сепак премине на Олд Трафорд, Њукасл мора да се фокусира на други алтернативи. Високо на нивната листа е напаѓачот на Астон Вила, Оли Воткинс, англискиот репрезентативец кој веќе неколку сезони настапува со успех во Премиер лигата, нудејќи сигурно решение.

На нивната листа се наоѓа и Николас Џексон од Челзи. Младиот напаѓач покажа потенцијал на Стамфорд Бриџ, но извори блиски до клубот тврдат дека моментално не е во фокусот бидејќи има повеќе имиња пред него во хиерархијата.

Њукасл го следи и напаѓачот на Фулам, Родриго Муниз. Иако директни преговори со Фулам засега нема, клубот преку посредници иницираше први контакти за испитување на можноста за трансфер. Во прелиминарните разговори се споменува отштета од околу 40 милиони фунти (околу 47 милиони евра).

Проблемите на Њукасл продолжија и за време на турнејата во Јужна Кореја, каде на стадионот Сувон Ворлд Кап изгубија 1:0 од тимот на К-Лигата. Оваа средба уште еднаш ги истакна главните проблеми во играта на екипата на Еди Хау: недостиг на голови и конкретност во нападот.

Без повредениот Александер Исак, Њукасл беше напаѓачки неефикасен, не успевајќи да искористи неколку полушанси и да ја пробие дисциплинираната одбрана на домашната екипа. Овој пораз дополнително нагласува колку е неопходно да се засили нападот пред почетокот на сезоната. Следниот пријателски натпревар на Њукасл ќе се одржи на 3 август против Тотенхем.