Алонсо го „прецрта“ детето на клубот, Перез мора да се активира на трансфер-маркетот

Реал Мадрид ова лето заврши со неколку клучни засилувања, но Чаби Алонсо сака уште промени.

Како што открија мадридските извори, Раул Асенсио не го убеди Чаби Алонсо и новиот тренер на Реал смета дека младиот стопер нема потребен квалитет за „кралскиот“ клуб. Асенсио беше трагичар и на неодамнешниот СП за клубови, особено во полуфиналето со Пари Сен Жермен, додека и на почетокот на турнирот заработи црвен картон и со своите грешки придонесе за голови на противниците.

Иако во Реал дојде Дин Хујсен, кого Чаби Алонсо го гледа како нов лидер на одбраната, проблемите се уште се очигледни.

Најнапред, Едер Милитао се враќа откако практично две години паузираше поради пукање на лигаментите на обете колена и големо е прашањето кога и во каква форма ќе биде. Антонио Ридигер е во години, а Давид Алаба не ја најде старата форма исто така по паузата од речиси една година поради колена.

Реал Мадрид сонува за Ибрахима Конате и Вилијам Салиба, како потенцијални замени за Алаба и Ридигер, но тие операции не се ниту малку лесни.

Фото: Принтскрин