Браим Диас става потпис на нов договор

Раководството на Реал Мадрид постигна договор со Браим Диас за продолжување на договорот со играчот, ексклузивно објави “Марка”.

Сегашниот договор на фудбалерот истекува во летото 2027 година, но сега тој ќе биде продолжен со подобрени финансиски услови, со оглед на неговото зголемено значење по одличната игра во последно време.

Во моментов тој е дел од составот на мадриѓаните кој се подготвува за дебито во Светскиот куп за клубови во САД. Првиот натпревар на „лос бланкос“ е во среда против Ал-Хилал.

25-годишниот крилен фудбалер го подигна своето значење и форма за Реал Мадрид во последните две сезони, што ќе биде одразено во новиот договор. Диас последен пат го обнови својот договор во летото 2023 година, кога се врати од двегодишна позајмица во Милан.