Роналдо се прости од Ал Наср: Ова поглавје заврши, но приказната продолжува

ФУДБАЛЕРИТЕ на Ал Наср синоќа со пораз го завршија првенството на Саудиска Арабија. Во последното коло изгубија на гости кај Ал Фатех со резултат 3:2, со што останаа на третото место на табелата со 70 поени, пет помалку од второпласираниот Ал-Хилал, кој така ќе игра во азиската Лига на шампионите следната сезона заедно со шампионот Ал-Итихад.

Кристијано Роналдо го постигна својот 25-ти првенствен гол во сезоната и вкупно 35 во сите натпреварувања. Така по втор пат по ред ја освои наградата за најдобар стрелец на саудиското првенство, а изгледа дека синоќа ја одигра последната натпреварувачка утакмица за клубот од Ријад.

Роналдо по вечерашната утакмица на социјалните мрежи објави своја фотографија од натпреварот со краток опис: “Ова поглавје е завршено. Приказната? Сеуште се пишува. Благодарен на сите.”

Договорот на Роналдо со Ал Наср истекува на 30 јуни, а фактот дека до денес не е направен нов договор, го засилува верувањето дека Португалецот се подготвува за заминување по две и пол години во Саудиска Арабија.