Оклахома го сруши НБА рекордот од 1972 година

Завршена е основната фаза на НБА сезоната, а сега следува борбата за титулата. Пред да започне вистинското доигрување, на распоредот е плеј-ин турнирот кој може да донесе дополнителна драма – затоа што од сега нема простор за грешки, секој натпревар може да значи крај.

Тековната регуларна фаза беше богата со приказни и неочекувани обрати на терените низ САД и Канада, а Оклахома Сити Тандер дополнително ја зачини приказната со рушење рекорд стар повеќе од половина век. Во 82 одиграни натпревари, тие остварија просечна разлика од +12,9 поени во своја корист, што е нов најдобар резултат во историјата на НБА лигата.

Никој досега не бил толку убедлив низ целата сезона. Со тоа, Оклахома го симна од тронот легендарните Лос Анџелес Лејкерс од сезоната 1971/72, кога нивните победи во просек беа за 12,3 поени разлика. Интересен е и податокот што сите екипи кои биле на врвот на оваа статистика на крајот ја освоиле титулата.

Тандер влегува во плеј-офот како еден од главните кандидати за титулата, а нивниот лидер Шеј Гилџис-Александер е еден од двајцата најсериозни претенденти за наградата MВП, заедно со Никола Јокиќ. Оклахома сезоната ја заврши со триумф над Њу Орлеанс со резултат 115:100, запишувајќи ја својата 68. победа.

Со тој резултат, тие се ставија во елитното друштво – само пет тимови во историјата имале подобар однос од нив: Голден Стејт Вориорс 2015/16 (73-9), Чикаго Булс во сезоните 1995/96 (72-10) и 1996/97 (69-13), Лејкерс од 1971/72 (69-13) и Филаделфија 76 од 1966/67 (68-13).