Алварез се огласи по поништениот пенал

Реал, по драматичниот натпревар против Атлетико, се избори за четвртфинале на Лигата на шампиони, каде што ќе ги чека Арсенал.

По поразот од 2:1 на Сантјаго Бернабеу, Атлетико во реваншот славеше со 1:0 со голот на Конор Галагер во првата минута.

Продолженијата не донесоа промена во резултатот па пеналите решаваа за тоа кој ќе продолжи понатаму. Реал беше поуспешен со 4:2, а главна тема беше поништениот пенал на Хулијан Алварез, кој се лизна и двапати ја допре топката.

По натпреварот, Алварез се изјасни на X, изразувајќи разочарување од испаѓањето и честитајќи му на Реал, но за поништениот пенал не коментираше.

„Боли да испаднеш откако си дал сѐ на теренот и се бориш до последната минута. Не ни беше судено, но оваа екипа покажа карактер, посветеност и срце. Благодарни сме на нашите навивачи што секогаш се тука, навиваат без престан и ја прават секоја утакмица посебна. Сега е време да продолжиме и да се фокусираме на тоа што следи. Честитки за Реал Мадрид за пласманот“, напиша Алварез на X.