Готово: Во Реал Мадрид донеле одлука за Модриќ!

Управата на Реал Мадрид ќе му понуди нов договор на капитенот на хрватската фудбалска репрезентација Лука Модриќ за уште една сезона, иако во септември ќе наполни 40 години, објави Николо Шира, угледен италијански новинар и експерт за трансфери на фудбалери.

Во објава на социјалната мрежа X, Николо Шира напиша дека Реал сака да го задржи својот капитен и следната сезона и дека ќе му понудат договор до летото 2026. Исто така, се наведува дека Модриќ сака да ја продолжи играчката кариера бидејќи сонува за настап со хрватската репрезентација на Светското првенство 2026.

Модриќ во неделата постигна гол во првенствената победа на Реал 2:0 против Жирона. Капитенот на Реал удри топка од 24 метри и ја затресе мрежата во 41. минута. „Кралскиот клуб“ со победата над Жирона продолжи во трката со најголемите конкуренти, Барселона и Атлетико Мадрид, во борбата за титулата шампион на Шпанија.

По натпреварот, тренерот Карло Анчелоти изјави дека Модриќ треба да продолжи да игра за европскиот шампион додека тоа го сака: „Модриќ треба да продолжи додека сака. Тоа што го прави, го прави одлично. Тој е дар за фудбалот поради својата сериозност, квалитет и професионализам.“

Модриќ е во Реал од 2012 година и со него освои бројни трофеи, а се истакнуваат шест титули од Лигата на шампионите, четири пати беше шампион на Шпанија, а благодарение на игрите во дресот на хрватската репрезентација и Реал, во 2018 беше прогласен за најдобар светски фудбалер.

🚨 Excl. – #РеалМадрид би сакале да го задржат Лука #Модриќ за уште една сезона. Спремни се да му понудат на хрватскиот играч нов договор до 2026, иако тој годинава ќе наполни 40 години. Модриќ изгледа дека е насочен да продолжи да игра; бидејќи сонува за Светскиот куп 2026. #трансфери

— Nicolò Schira (@NicoSchira) February 23, 2025