Критики за Влаховиќ: Така докажува дека не е голем фудбалер

Душан Влаховиќ постигна два гола во победата на Јувентус од 3:0 за викендот против Џенова, а еден од погодоците српскиот напаѓач го прослави со гестикулација на која сакаше да им порача на критичарите да продолжат да зборуваат.

Причина за таквата прослава на Влаховиќ се критиките кои во изминатиот период ги добиваше од јавноста во Италија за своите настапи.

Паоло Ди Канио, пензионираниот италијански фудбалер и освојувач на Купот на УЕФА со Јувентус во сезоната 1992/1993 го прокоментира тој потег на Влаховиќ.

„Тоа го прават малите фудбалери. Тој е одличен фудбалер, но со таквиот потег докажува дека не е голем играч. Неговото однесување не доликува на големите играчи. Постигна гол од пенал и тоа е во ред, никогаш не е лесно да постигнете погодок, а потоа додаде уште еден гол. Но, тоа го направи проитив Џенова, тим кој има многу проблеми. Исто така и натпреварот се играше без публика“.

„Не беше тоа гол против конкурентите за титулата, би било погрешно и тогаш, но голот би имал поинакво значење. Постигни два гола против директните ривали, па потоа можеш да бидеш арогантен. Вака два гола против Џенова зад затворени врати е како два гола во пријателски натпревар“, изјави Ди Канио.