Реграги: Што ќе ми е 70% поседн на топка ако шутнам двапати на гол?

Репрезентацијата на Мароко е најголемото изненадување на Светското првенство во Катар, во група со Белгија и Хрватска завршија на првото место, а потоа во нокаут фазата ги елиминираа Португалија и Шпанија.

Во полуфиналето Мароко го чека натпревар со актуелниот светски шампион Франција. На прес-конференцијата пред утрешниот натпревар селекторот Валид Реграги доби критики за дефанзивниот стил на игра.

„Што ќе ми посед на топка од 70% за да шутнеме два пати на гол? Ќе му кажам на Инфантино да дава бод на тимот кој ќе има 60% или повеќе посед на топка“, иронично одговори мароканскиот селектор, па беше посериозен.

„Исто така, за да имате посед на топка, треба да имате одреден тип на играчи. Погледнете го Манчестер Сити, имаат 70% посед на топка ама со играчи како Де Брајне, Бернардо Силва…“

„Да, можеме да зборуваме за „тики-така“, ама кога би имале соодветни играчи за ваков стил на игра“, истакна Реграги.