Јаневски: Некои работи не се купуваат со пари!

Вардар забележа две победи во плеј-офот од Лига Европа и се пласираше во групната фаза. Најпрво во Скопје беше совладан Фенербахче со 2:0, а вечерва во Истанбул истиот тим беше поразен пред своите гледачи со 1:2.

„Најпрво сакам да им кажам благодарам на домаќините и нивниот пречек кон Вардар во Истанбул. Потоа, честитки до сите мои играчи, кои забележаа две победи во плеј-офот против тим како што е Фенербахче“, започна Јаневски.

Многумина можат да кажат дека ова е среќа, но кога во седум денови ќе го победите Фенербахче два пати, тогаш е јасно дека се работи за нешто многу повеќе од среќа.

„Ова е доказ дека со напорна работа и труд, ќе дојдат и резултати. Ова не е среќа, туку исполнување на голема желба со мудра работа. Вардар е гордоста на Македонија. Верувајте ми, оваа среќа не може да се купи со пари“, додаде Јаневски.