Куман после шокот во Леванте: Некои работи е тешко да се објаснат

Барселона синоќа на гостувањето кај Леванте повторно изгуби бодови откако одиграа 3:3 и веројатно се прости од титулата во Ла Лига.

Екипата на Роналд Куман успеа да прокоцка два бода предност и на крајот освои само бод кој ги оддалечи од лигашката титула.

Холандскиот стручњак беше разочаран од се што се случуваше на теренот.

„Дозволивме да се вратат во игра бидејќи загубивме многу топку во второто полувреме. Некогаш постојат работи кои е тешко да се објаснат. Во второто полувреме игравме со премал интензитет, а кога си помалку агресивен, реагираш послабо. Забавивме и тоа е проблемот.“

Куман смета дека комплетиот тим дефанзивно потфрли.

„Не обвинувам никој посебно. Комплетиот тим дефанзивно потфрли. Премногу е да примите три погодоци. Јас како тренер сум најодговорен, но се прашувам што се случи бидејќи на полувремето зборувавме за интензитетот на игра, а го загубивме во продолжение.“

Тренерот на Барселона е свесен дека првенството веројатно е загубено.

„Се најдовме во комплицирана ситуација. Зависиме од други. Како тренер јас сум најодговорен. Дали останувам во клубот? Тренерите секогаш се под притисок и тоа го разбирам.“ – рече Куман.

За Барселона да биде првак потребно е Атлетико и Реал Мадрид да киксна барем два пати до крајот на сезоната, а Барса да освои шест бода.

Каталонците последните два натпревари ги играат против Селта и Еибар.