Шаландес: Зошто оставка? Се чудам зошто мислите дека Македонија не е силна

Македонија вечерва оствари голем триумф против Косово и се пласираше во финалето од баражот во Лигата на Нации.

По натпреварот прес-конференција одржа селекторот на Косово Бернард Шаландес.

„Ова беше тежок натпревар за двете репрезентации, одигравме едно добро прво полувреме. Немавме среќа, посебно при првиот гол кога топката одеше надвор, но од еден наш играч заврши во мрежата. Во фудбалот се случуваат и грешки, ние не реагиравме добро после одличниот центар шут на Барди и бевме казнети“.

„Во второто полувреме направивме измени, се обидовме да стигнеме до изедначување, се отворивме, а тоа беше шанса за Македонија. Ние имавме една добра прилика на крајот, но за жал не ја искористивме. Секако, честитки до Македонија на пласманот во финалето“.

Дали би си поднел оставка по овој пораз?

„Не. Зошто да си поднесам оставка? Ние не сме Германија, Италија, Франција…Можеби имавме лоши резултати со Грција и Македонија, но се чудам зошто мислите дека тоа не се силни репрезентации“.