Пиоли пред реваншот со Јувентус: Шансите за финале се 50-50

Милан утре му гостува на Јувентус во реванш полуфиналниот дуел од Купот.

Тренерот на Милан, Стефано Пиоли смета дека двете екипи имаат подеднакви шанси за пласман во финалето и истакна дека целта на „росонерите“ оваа сезона е излез во Европа.

„Фудбалот повторно е најважната работа и треба да се вратиме безбедно на него. Важно е дека повторно ќе играме, секако моите играчи не се 100% подготвени како порано, но сметам дека шансите за пласман во финалето се подеднакви“, истакна Пиоли.

„Мојата цел е јасна – да дадам се од себе и да извлечам максимум од оваа сезона. Целта на Милан е да се врати во Европа преку првенството или Купот. Јас секогаш им кажувам на играчите дека најважен е амблемот на нивните гради, а не имињата на грбот. Ние двапати се судривме со Јувентус оваа сезона. Беше тешко за нив, како што беше и за нас“, заклучи тренерот на „росонерите“.