Ибрахимовиќ доживеа разочараување: Тоа е тажно…

Додека трае пандемијата со коронавирусот Златан Ибрахимовиќ времето го поминува во Шведска.

Искусниот фудбалер формата ја одржува тренирајќи со тамошниот Хамарби, каде воедно е еден од сопствениците, а не е исклучено и да заигра за овој клуб кога ќе му истече договорот со Милан.

Тоа го кажа Ибра во разговор за локалните медиуми, кои, нормално, ги интересираше што мисли за тоа дека денес е омразена личност во родниот Малме. Навивачите на овој клуб во знак на протест ја уништија неговата статуа која беше поставена пред стадионот.

„Тоа е тажно. Тие кои ги знаат сите детали, никогаш не би направиле такво нешто. Оние кои сакаат внимание и сакаат да пишуваат во медиумите за тоа бидејќи мислат дека е ‘кул’ се на детско ниво. Ние сме поголеми од тоа. Статуата беше таква каква што беше, а тоа што статуа не постои не значи дека не постои и моја историја. Таа останува засекогаш.“ – порача Ибра.

Фудбалерот на Милан исто така додаде дека се уште не размислува за крај на кариерата и дека ќе игра се додека телото го слуша.