Бјелица воодушевен од Гвардиола: „Потегот му беше господски“

Тренерот на Динамо Загреб, Ненад Бјелица за хрватските медиуми откри детали од средбата со Пеп Гвардиола.

Клубот од Загреб во дуелот одигран на Етихад беше поразен со 2:0, што е добар резултат ако се земе во предвид дека се работи за еден од најдобрите тимови на светот, а во долго сеќавање за Бјелица ќе му остане средбата со тренерот Пеп Гвардиола.

Пред самиот почеток на натпреварот, додека Бјелица беше свртен со грб му се доближи Пеп Гвардиола и започна конверзација на шпански јазик, кој тренерот на Динамо го знае уште од времето додека играше за Бетис.

Според фотографиите се гледа дека средбата била пријатна, а сега Бјелица го прераскажа разговорот со стратегот на Сити.

„Зборувавме на шпански јазик. Тој како вистински домаќим ми се доближи пред почетокот на натпреварот, малку поразговаравме, како што јас како домашен тренер на Максимир ги поздравувам нашите гости. Тоа го направи господски, ми честиташе на сите мои успеси, а јас му ги честитав досегашните и идните остварувања.“ – изјави Бјелица и додаде:

„Ми посака добар натпревар. На крајот се ракувавме, му ја честитав победата, а подоцна уште еднаш на кратко се сретнавме.“

Бјелица додаде дека натпреварот против Сити за него беше еден од најголемите натпревари во тренерската кариера.