Хаос на тренингот на Фулам – Камара заврши во притвор!

Напаѓачот на Фулам, Абибакар Камара е уапсен под сомнение дека му нанел тешки телесни повреди на едно лице во тренинг центарот на овој клуб.

Полицијата интервенирала по повик во понеделникот попладне, а медиумите дознаваат дека во тепачката учествувало уште едно лице од стручниот штаб на Фулам.

Откако беше исфрлен од првиот тим од страна на тренерот Раниери, Камара пристигнал во тренинг центарот да разговара со раководството. Но, посетата завршила со негово апсење.

„Полицијата доби повик во понеделникот околу 17 часот за тепачка во тренинг центарот на Фулам. Во таа прилика беше уапсено едно лице на возраст од 23 години кое и понатаму се наоѓа во притвор“, соопштија од полицијата.

Од Фулам преку официјално соопштение и се заблагодарија на полицијата за брзата реакција и потврдија дека на тоа лице ќе му биде забранет влез во клупските простории.