Фудбалски натпревар во Украина се играше пет часа

Украинските фудбалски прволигаши Дњипро и Олександрија во понеделникот одиграа натпревар кој траеше скоро пет часа и тоа најдолгиот во историјата на украинското првенство.

Натпреварот од 13. коло во украинското првенство кој се играше во Дњипро започна во 17:00 часот, а се заврши нешто пред 22 часот, по скоро 280 минути.

Причината беа бројните прекини поради алармите за воздушни напади. Натпреварите во Украина поради безбедносни причини се играат пред празни трибини и мораат да бидат прекинати во случај на воздушна опасност. Алармите за време на овој натпревар се огласија неколку пати.

„Ова е најдолгиот натпревар во украинскиот фудбал“, пренесуваат украинските медиуми.

На крајот Дњипро победи со 1:0, единствениот гол на натпреварот го постигна Александар Филипов по 34 минути игра. Дњипро во овој момент се наоѓа на второто место во првенството со 27 бодови колку што има и водечкиот Кривбас. Шахтјор е четврти, додека гигантот Динамо Киев е дури осми со 16 бодови.