Тотенхем – Борусија Дортмунд: „Милионерите“ бараат одмазда, Тотенхем има свои адути

Тотенхем е домаќин на Борусија Дортмунд во рамки на  осминафиналето од фудбалската Лига на Шампиони. Овие две екипи и минатата сезона играа меѓусебе во истото натпреварување, а на двата меча славеше Тотенхем. Сега ситуацијата е променета и не очекуваат два доста неизвесни и интересни натпревари.

Тотенхем изгледа доста храбро без Али и Кејн

Сите очекувања беа дека Тотенхем ќе доживее голем пад во изминатиот период, откако тимот се соочи со доста проблеми со повредњни фудбалери. Но, наместо тоа тие покажаа одлични игри, голем карактер и борбеност. Три победи во серија во Премиер Лигата по ред ги задржаа во трката за титулата. И додека тие и не беа баш убедливи во победите на ниту еден од тие три натпревари (славеа победи против Ватфорд и Њукасл во последните моменти) тие покажаа голем борбен дух. Токму тој борбен дух може да се покаже како клучен во овој двомеч со Борусија Дортмунд. Но и овој пат Спарси ќе бидат без Али, а веројатно и без Кејн и тоа е голем проблем за одличниот Покетино.

Најмногу се очекува од Сон

Кејн веројатно нема да настапи. Тој ги пропушти предходните натпревари, а иако постојат некои најави дека ќе биде спремен за овој меч тоа е малку веројатно. Лекарскиот тим на Тотенхем прави се за да го оспособи за настап. Но дури и да настапи тој нема да може да одигра 90 минути, или пак да одигра со 100 проценти од своите можности.

Затоа во преден план сега излегуваат имињата на Ериксен и Сон. Ериксен постигна гол и помогна многу против лисиците, додека Сон постигна голови на сите три последни победи на Спарс во Премиер лигата. Токму од Сон се очекува најмногу на овој меч, а има и добри причини за тоа. Кореецот одлично го познава германскиот фудбал. Тој како талентиран играч ја градеше кариерата во Бундеслигата во Хамбург и Баер Леверкузен. Таму имаше неверојатни партии, а сега е уште подобар од времето кога играше во Германија. Јасно е дека неговиот настап во отсуство на Кејн ќе биде клучен, но тоа добро го знаат и германците кои ќе се обидат да го затворат Сон.

Дортмунд не е истиот тим од минатата сезона

Дортмунд под водство на Лусиен Фавре е сосема поинаков тим, во однос на тоа како изгледаше тимот под водство на неговите предходници Питер Бош и Петар Стогер. Тимот сега е многу поразновиден, посмирен кога е во незгодна позиција и знае што сака во секој момент од натпреварот. Многу од играчите на Дортмунд кои се појавија на теренот минатата сезона кога Тотенхем во двомечот од Лигата на Шампиони славеше на два пати, заминаа или не се блиску до првиот тим. Од таа гледна точка, тие натпревари од минатата сезона, сега не мора да значат ништо. Се случија доста промени во двата тима, особено во Дортмунд. Освен тоа, оваа германска екипа игра секогаш добро на Островот и тоа полека прераснува во традиција.

Само два порази за Дортмунд оваа сезона

Во оваа неверојатна сезона, Борусија Дортмунд помина многу тешки тестови и тоа речиси сите со чиста петка. Тие го совладаа германскиот шампион Баерн Минхен во доста интересен меч. Отидоа на гости кај непобедливиот на домашен терен Лајпциг и славеа победа против тимот кој не доживеа ниту еден пораз на домашен терен освен птотив милионерите. Тие, исто така ги посетија своите огромни ривали Шалке и се радуваа на трите бода во моментот кога Шалке играше во топ форма. Сега Дортмунд има пет поени повеќе од Баерн Минхен и е на врвот на табелата во Бундеслигата. Тие беа и на врвот на групата во Лигата на шампионите, во која беше и Атлетико Мадрид. Токму против Атлетико тие го доживеаа еден од двата порази сезонава.

Одбраната на Дортмунд покажа слабости во последните дуели

Сепак минативе две недели беа тешки за нив. Прво одиграа нерешено со Франкфурт, а потоа беа исфрлени од Купот на ДФБ по пенали од Вердер Бремен. На тој меч двапати водеа во дополнителното време но на крајот беше 3:3 па немаа среќа во пенал рулетот. На последниот натпревар минатиот викенд одиграа нерешено против Хофенхајм и повторно примија три гола. За да биде трагедијата поголема, тие водеа со 3:0 до 75-та минута но потоа примија три гола доволни само за бод.

Дортмунд направи некои катастрофални грешки во одбраната на овие последни натпревари. Тие грешки ќе бидат поука за играчите на Тотенхем, како треба да се одигра против Дортмунд. Абду Диало е се понесигурен во последната линија, а Хакими тотално беше изгубен во вториот дел против Хофенхајм. Враќањето во средниот ред на Томас Делани ќе помогне на одбраната и тој ќе биде стациониран во средината заедно со Витсел. Но од друга страна Дортмунд ќе има проблем и во офанзивата бидејќи ќе настапи без повредениот Ројс, а тоа е голем удар за тимот.

Санчо во центарот на вниманието

Сепак, англискиот тинејџер Санчо беше извонреден против Хофенхајм, а неговата конзистентност беше на неверојатно ниво. За неговата брзина пак не треба да се трошат зборови. Крилото постигна седум гола и асистираше за уште девет во Бундеслигата, а играњето на Вембли дополнително ќе го мотивира, бидејќи тој сака да се докаже токму на англиско тло.

Затоа повредата на Марко Ројс кој постигна 13 голови и асистираше на уште шест, можеби и нема да се осети до таа мера до која очекуваат англичаните.