Славниот англиски судија: Ваков пенал во Премиерлига никогаш нема да се досуди!

Манчестер Јунајтед синоќа направи големо изненадување и се пласираше во четвртфиналето од Лигата на шампиони, откако го победи ПСЖ на гостински терен со 1:3.

Голема прашина се крена токму за третиот гол на Манчестер Јунајтед, кој го постигна Рашфорд од белата точка.

Судијата Скомина после консултација со ВАР досуди пенал за „црвените ѓаволи“ после играњето со рака на Кимпембе во шеснаесетникот.

Денес многу експерти дебатираа на оваа тема, а свое видување даде и славниот англиски судија Марк Клатенбург. Тој тврди дека ваков пенал во Премиер лигата никогаш нема да биде досуден, но според правилата на УЕФА правилно бил досуден.

„На луѓето мора една работа да им биде јасна, Дамир Скомина во целост ги испочитува законите и правилата на УЕФА, затоа тоа беше досуден пенал за Јунајтед. Сигурно е дека ПСЖ по ова ќе бидат бесни, но никоја екипа не е над правилникот на УЕФА“.

„Фудбалерот Кимбампе не играше намерно со рака, но инструкциите кои произлегуваат од куќата на фудбалот, одат во таа насока дека судиите не смеат да гледаат дали некој играл со намера или случајно, ако е рака, тоа е пенал. Ова во Премиерлигата не би бил пенал, но во ЛШ поради УЕФА, ова мора и треба да биде пенал“, истакна Клатенбург.

Клатенбург пред две сезони се реши да ја напушти Премиер лигата и кариерата да ја продолжи во Саудиска Арабија, каде има задачата да ги обучува домашните судии.