Претседателот на Лацио суспендиран на седум месеци

Римски Лацио избегна одземање на бодови, но претседателот на клубот Клаудио Лотито е суспендиран на седум месеци поради кршење на ковид протоколите.

Италијанското обвинителство започна постапка против Лацио откако беа откриени малверзации со тестовите на корона во октомври минатата година.

Неколку играчи на римскиот клуб беа позитивни пред дуел од Лигата на шампионите, додека тестовите за Серија А им беа негативни и тоа предизвика сомнежи за малверзации околу тестирањето.

На крајот е започната постапка и исходот е суспензија на Клаудио Лотито на седум месеци.

Покрај него клупските доктори Фабио Родиа и Иво Плучини ќе добијат суспензија од 12 месеци, додека клубот ќе плати казна од 150.000 евра.