Погба: Јувентус е број еден во Италија, моето срце ми кажа да се вратам

Попладнево Пол Погба го имаше своето второ претставување во Јувентус од каде што замина пред шест години за 105 милиони евра во Манчестер Јунајтед.

Погба во Јунајтед не успеа да ги исполни очекувањата во целост и никогаш не играше во формата со која го носеше дресот на Јувентус. Сега се врати во ситуација кога Јувентус не е доминатен како во претходните години.

„Јувентус сеогаш бил број еден во Италија и затоа е чудно да се види во ситуација како денес. Чудно е да дојдете и да видите дека не сте ја освоиле титулата минатата сезона, но тоа треба да биде дополнителна мотивација за напорно да работиме. Да се освои Скудетото не е лесно, во лигата има силни тимови“.

„За мене се интересираа и други клубови, но моето срце го избра Јувентус. Среќен сум и за годините во Манчестер и се надевам дека сега ќе доприносам за нови успеси. Едвај ја чекам новата етапа со Јувентус“.

„Мораме да бидеме подобри. Првата цел е освојување на Серија А, а ја сонуваме и Лигата на шампионите. Гладни сме за победи“, порача Погба.