Од Фенербахче едногласни: Сакаме предност уште по првиот натпревар

Турскиот тим Фенербахче ја одржа прес-конференцијата пред дуелот со Вардар во плеј-офот за Лига Европа. Турците се фаворити, но велат дека имаат почит кон Вардар, а стратегот Ајкут Кочаман изрази задоволство и што Елиф Елмас е со тимот, иако нема право на настап додека не наполни 18 години.

-Нашата цел е јасна, сакаме да се пласираме во групната фаза од Лига Европа. На хартија сме фаворити, но мора тоа да го докажеме и на терен. Се уште не знам со кој состав ќе настапам утре,-изјави стратегот на Фенербахче.

Новото засилување Солдадо ќе биде на располагање, иако првично планирал да му даде мала шанса, тренерот Кочман поради повреда на Робин Ван Перси, ќе му овозможи поголема минутажа на напаѓачот.

-Фактот што Ван Перси е повреден ќе биди причина да му дадам поголема минутажа на Солдадо, кој се уште не е адаптиран на новите соиграчи,- додаде Кочаман.

Стратегот Кочаман го прокоментира и заминувањето на Гоце Седлоски. Ја анализирале неговата игра со Малме и Копенхаген, па иако не знае кој ќе ги предводи „црвено-црните“, не верува дека може да има драстична промена околу начинот на игра.

Алпер Потук е еден од главните играчи на Фенербахче и од него ќе се очекува многу. Тој порача дека има голема почит кон противникот.

-Го анализиравме Вардар, имаме почит кон нив, но ние се надеваме да забележиме успех уште во првиот натпревар. Нашата цел е резултатска предност уште од првиот натпревар,- изјави фудбалерот на Фенербахче, Алпер Потук.