Мурињо: Убаво е да играш финале во ЛШ ама тоа не е историја

Maурисио Покетино помина пет ипол години во Тотенхем, а после неговиот отказ во Тотенхем минатата недела го наследи Жозе Мурињо.

Португалецот ја освојуваше Лигата на шампионите со Порто и Интер, може ли тоа да го направи и со Тотенхем? Клубот од северен Лондон играше финале минатата година, но Жозе знае дека само со играње финале не се пишува историја.

„Со овие момци нема да се плашам во ниту еден натпревар. Да се дојде до финалето е убаво, но тоа не е историја – историја е да ја освоиш Лигата на шампионите“, јасно порача Португалецот.

Мурињо авантурата во Тотенхем ја започна со победа над Вест Хем од 3:2. Првиот натпревар на стадионот на Тотенхем Мурињо ќе го има во вторник навечер кога во Лигата на шампионите го пречекува Олимпијакос.

Покетино претходно зборуваше дека потребно е „чудо“ за Спарси да ја освојат Лигата на шампионите, а Мурињо денес истакна и дека е тука за да направи чудо. Еве што кажа за натпреварот Мурињо.

„Како менаџер важно е да победите во првиот натпревар дома. Нашиот стадион е најдобар во светот и имаме голема поддршка и затоа ќе се обидеме да направиме добар резултат. Дајте ми време да ги развијам своите идеи и нема да имаме проблем да играме против било кој тим во Европа. Од никого не се плашиме“, изјави Мурињо.