Манчини поради Италија се откажува од 13 милиони евра

Роберто Манчини ќе биде новиот селектор на Италија и тука повеќе нема никакви дилеми, потписот се очекува најдоцна до среда.

Она што е ново во оваа приказна е делот во кој Манчини ќе се откаже од заработката во Зенит за да седне на клупата на Италија. Имено, од повеќе извори е потврдено дека по прекинот на соработката со Зенит Италијанецот ќе остане без 13 милиони евра, токму толку би заработил доколку го испочитуваше до крај договорот со Русите.

Манчини со „Аѕурите“ ќе потпише договор на две години со можност за продолжување на уште една и плата од два милиони евра по сезона.

Дебито на Манчини на клупата на Италија се очекува против селекцијата на Обединетите Арапски Емирати на 28 мај.

Да потсетиме, Италијанците се без селектор откако Џампиеро Вентура заработи отказот бидејќи не успеа да се пласира на Мундијалот кој ова лето ќе се одржи во Русија.