ЛШ: Челзи сигурен против Милан, Реал се „извади“во 95-та

Вечерашното дерби требаше да се игра на стадионот Сан Сиро, но тоа беше дерби само на хартија.

Челзи вторпат во шест дена го совлада Милан и покажа колку е голема моменталната разлика во квалитет меѓу Премиер лигата и Серија А. Шампионот на Италија немаше никакви шанси на овој двомеч. Црната вечер на италијанските клубови е комплетирана, откако претходно вечерва Јувентус беше поразен од Макаби Хаифа.

Одлучувачкиот момент во Милано се случи во 17. минута. Маунт имаше шанса за гол во шеснаесетникот на Милан, Томори го повлече одзади, а судијата Зиберт покажа на белата точка и му додели директен црвен картон на стоперот на Милан и поранешен играч на Челзи. Жоргињо ја презеде одговорноста и го совладаТатарушану од белата точка, за 0:1 во 21. минута.

Шест минути подоцна, Оливие Жиру пропушти одлична шанса да постигне гол против својот поранешен клуб и да донесе израмнување на Милан. Тој од идеална позиција шутираше над голот. Казната дојде во 34. минута и тоа преку Обамејанг.

Во продолжение Челзи очекувано го прекина ритамот, а Милан пропушти можност да се врати во 59. минута. Леао се проби во свој стил, проигра покрај Дест, а овој очајно шутираше во позитивна позиција и ја испрати топката високо над голот.

Шахтјор Доњецк и Реал Мадрид одиграа нерешено 1:1 во Варшава.

Европскиот шампион израмни во 95. минута со голот на Ридигер и со тоа ја продолжи серијата без пораз оваа сезона. Домашните поведоа преку Олександр Зубков на самиот почеток од вториот дел во 46. минута.