Калчото се враќа: Клубовите од Италија немале ваков учинок во ЛШ уште од пред „Калчополи“!

Италијанските клубови на стартот од сезоната играат одлично во Лигата на шампионите и после вчерашните натпревари го подигнаа коефициентот на италијанската над англиската (тука).

Клубовите од Апенините од поодамна не играле во најелитното европско натпреварување како на стартот оваа сезона.

Италија има четири претставници во групната фаза од Лигата на шампионите – Јувентус, Рома, Наполи и Интер. Овие четири клуба во првите две кола, односно вкупно осум натпревари забележаа шест победи.

Последно вакво нешто на клубовите од „чизмата“ им успеало уште во 2005 година, една година пред да се појави скандалот со наместени натпревари „Калчополи“.

Засега Интер и Јувентус имаат максимален број на бодови (6), Наполи освои четири, додека Рома е најслаба со три, но и тие се во добра позиција за пласман во осминафиналето.