Како Јунајтед ја прокоцка ЅВЕЗДАТА на Мундијалот: Мбапе ќе беше дел од „Ѓаволите“ за само пет милиони фунти

Рајан Гигс единствено знаел што ќе се случи…

Килијан Мбапе е еден од играчите кои заблескаа на СП во Русија, но овој млад француски напаѓач веќе две години со својата игра го воодушевува светот.

Мбапе се појави во Монако за кој дебитираше како тинејџер, а во својата прва сезона покажа дека се работи за голем талент. ПСЖ изминатото лето одлучи да плати околу 180 милиони евра за овој напаѓач бидејќи знаеја дека Мбапе вреди, и дека ќе им се исплати влогот во иднина.

Меѓутоа, малкумина знаат дека Манчестер Јунајтед имаше прилика да го донесе Мбапе пред две години и тоа за само пет милиони фунти. Тогаш Рајан Гигс ги следел Габриел Жезус и Мбапе и му порача на Јунајтед дека може да ги донесе обајцата.

„Мбапе го гледав пред светот да слушне за него и видов дека ќе биде фантастичен. Им кажав на сопствениците на клубот дека треба да ги донесат него и Габриел Жезус. Мбапе можеа да го купат за пет милиони фунти и тогаш да го вратат во Монако на позајмица, но не го сторија тоа. Една година подоцна чинеше 180 милиони евра“, истакна Гигс.