Историјата е испишана: Вардар стигна до хет-трик титули во СЕХА!

Вардар вечерва испиша историја!

Црвено-црните во финалето на СЕХА лигата го победија Загреб со 23:26 и така ја освоија третата титула во низа во ова натпреварување.

Вардар овој пат против Загреб не доминираше како првиот осминафинален натпревар во Лигата на шампионите. Загреб во поголем дел од натпреварот беше достоен противник.

Во 11-тата минута Загреб имаше и предност од 7:4, но Вардар предводен од одличниот Милосављев на голот успеа да се врати и да го сврти резултатот во своја корист.

Рожерио Мораес заработи црвен картон, но тоа не го спречи Вардар да стигне до победата.

За жал негативна работа за Вардар од ова финале е тешката повреда на Кристијан Дисингер за кого многу веројатно дека сезоната е завршена.

Загреб имаше налет и во вториот дел кога Хрватите изедначија на 14:14, но тогаш останаа без Давид Мандиќ кој го заработи третото исклучување и тоа можеби беше еден од клучните моменти.

На десетина минути пред крајот Вардар се одлепи на +4 (22:18). Во финишот одново одличен беше Милосвањев кој одбрани неколку удари и обезбеди нова титула за Вардар.

Најефикасен за Вардар во денешниот натпревар беше Криштопанс кој постигна седум гола во денешното финале.

Во идеалниот тим на фајнл-фор турнирот од Вардар место добија Дибиров, Криштопанс, Милосављев и Стоилов.