Иванишевиќ ја откри причината за разделбата со Ѓоковиќ

Најдобриот тенисер во светот, Новак Ѓоковиќ, неодамна се раздели со својот тренер Горан Иванишевиќ после петгодишна соработка.

Ѓоковиќ имаше одлична соработка со Иванишевиќ и истакна дека и понатаму остануваат пријатели, а сега се огласи хрватскиот тренер и проговори за прекинот на соработката.

„Поразот во Индијан Велс не е причината. Ако сакаме да бидеме искрени, почувствував уште на САД Опен минатата година дека доаѓа до заситување. И мене како тренер, поразот на Новак во финалето на Вимблдон, тешко ми падна, Алкарас беше подобар и секоја чест, но одлучија еден-два поени. Потоа турнирите во САД беа неверојатни, Новак триумфира во Синсинати и на САД опен, но јас тука почувствував дека се ближи крајот и прашање на време беше дали ќе се разделиме минатата година или оваа“.

„Можеби требаше да го направиме ова уште минатата година, но јас по САД опен го оперирав коленото и ме немаше едно 6-7 недели. Се вратив за завршниот мастерс во Торино, но тогаш беше евидентен заморот на материјал и проблемот во комуникацијата“, изјави Иванишевиќ.