Битолчани пред дербито: Не носете парички и тврди предмети, ќе ви бидат одземени

Денес веројатно ќе го добиеме одговорот на прашањето ќе имаме нов ракометен шампион или Вардар ќе ја одбрани титулата.

Од 19:00 часот Вардар гостува во Битола, на црвено-црните им одговара и реми да останат на врвот, додека домаќините мораат да слават. Салата „Боро Чурлевски“ ќе биде преполна билетите се распродадоа за само 17 минути од пуштањето во продажба.

Од битолскиот клуб сега упатуваат апел до навивачите се да помине во најдобар ред и без инциденти.

РК Еурофарм Пелистер ги известува сите љубители на ракометот кои купија билети и ќе го следат натпреварот од 12. коло на плеј-офот меѓу Еурофарм Пелистер и Вардар 1961 (сабота, 6 мај – 19:00 часот) дека вратите на спортската сала „Боро Чурлевски“ ќе бидат отворени во 17:00 часот, а ќе се затворат во 18:30 часот.

Ги повикуваме присутните во салата да не носат со себе парички, тврди предмети, цигари, бидејќи истите на влезовите ќе бидат одземени.

На врвот на табелата Вардар и Еурофарм Пелистер се изедначени со по 33 бодови, а Алкалоид има шест помалку. Натпреварот во Скопје кој беше одбележан со инциденти заврши со победа на Вардар од 31:24.