Агентот на Де Јонг пристигна во Барселона на важен состанок

Барселона ќе направи уште еден обид да најде решение за случајот со Френки де Јонг кој и понатаму е сериозен проблем за клубот.

Агентот на играчот, Али Дурсун, пристигна во каталонската престолнина и денеска се очекува да се сретне со раководството на Барселона. Двете страни ќе разговараат за различни опции за излез од ситуацијата.

Како што е познато, Барса бара Де Јонг да ја намали платата или да се согласи да биде продаден. Меѓу кандидатите за потписот на холандскиот интернационалец се Манчестер Јунајтед и Челзи, а последните денови се појавија информации за интерес од Баерн Минхен и Ливерпул.

Во моментов Де Јонг категорично одбива да ја намали својата плата, бидејќи клубот веќе му должи помеѓу 17 и 18 милиони евра за одложени плати од периодот од пандемијата.

Според каталонските медиуми, посетата на Али Дурсун е поврзана и со уште еден негов клиент од Барселона, Мартин Брајтвајт. Данскиот напаѓач одби да го раскине договорот и ја сака целата сума од платите.