Љубомора или реалност: Ракитиќ го коментираше трансферот на Кутињо и изненади многумина

Филипе Кутињо и официјално е нов играч на Барселона, каде што пристигна за 160 милиони евра од Ливерпул.

Официјалната презентација ќе биде во понеделник, додека по победата од 3:0 против Леванте на навивачите им се обрати преку Твитерот на клубот. Неговото доаѓање го коментираше и Иван Ракитиќ.

„Моето мислење не е важно, но цената е малку превисока. Така диктира пазарот. Секој голем играч е добредојден овде. Му честитам на претседателот и на сите останати кои го направија овој трансфер. Тој сега е дел од семејството, во најголемиот клуб во светот, ќе уживаме со него“, изјави Хрватот.

„Среќни сме што ни се приклучи нов играч, еден од најдобрите. Јасно е дека нема да игра во ЛШ, но тоа го знаевме. Треба да му дадеме време да се прилагоди, ќе ни помогне во лигата и Купот“, додаде Ракитиќ.