„Ѓоковиќ е љубоморен на Надал и Федерер“

Поранешниот британски тенисер Тим Хенман беше многу воздржан за време на Отвореното првенство на Австралија како репортер за „Еуроспорт“ и од него не можевме да слушнеме поконкретно мислење – дури и кога го интервјуираше Новак Ѓоковиќ – меѓутоа штом заврши натпреварувањето, може да се каже дека „му се одврза“ јазикот”.

Во интервју за британскиот „Експрес“, Тим Хенман изјави дека секогаш забележувал дека Новак на некој начин е „љубоморен на Федерер и Надал“ поради нивната врска со навивачите, па во тоа лежи и неговата лутина покажана во Мелбурн.

„Мислам дека, ако малку подлабоко погледнете, според моето мислење, Новак Ѓоковиќ отсекогаш копнеел за таа наклонетост што секогаш им ја покажуваа на Федерер и Надал“, рече Тим Хенман и додаде: „И некои луѓе, претпоставувам, не го сакаат тоа, не им се допаѓа начинот на кој се однесува. Но, целата работа не е баш моја специјалност. Ако го погледнете она што го постигнал, ако ја погледнете речиси секоја статистика, тој е најдобар во сите нив. Тој е феноменален“.