Уште едно големо признание за Новак Ѓоковиќ

Новак Ѓоковиќ сосема заслужено по одличната година која ја има зад себе во последните денови од 2023. собира признанија.

Американската гимнастичарка Симоне Билес и српскиот тенисер се најдобрите спортисти во 2023 година според Меѓународната асоцијација на спортски новинари (AIPS). Во изборот учествуваа 405 новинари од 107 земји.

Билес, која по двегодишно отсуство се врати на големата сцена и го освои златниот медал во севкупниот натпревар на Светското првенство во Антверпен, Белгија и уште три златни медали – на греда и под и во екипна конкуренција – доби 353 поени.

Втора заврши кениската атлетичарка Фејт Кипјегон (329), а трета шпанската фудбалерка Аитана Бонмати (297).

Во машка конкуренција Ѓоковиќ ја збриша конкуренцијата. Победникот на три од овогодинешните четири Грен слем турнири – Австралија Опен, Ролан Гарос и УС Опен и победникот на завршниот Мастерс во Торино, доби 616 поени.

На второ место е шведскиот скокач со стап Арманд Дуплантис (335), а на третото е аргентинскиот фудбалер Лионел Меси (277).