Погба открива што се разговарало во соблекувалната после дебаклот од Евертон

Французинот беше разочаран од настапот на својата екипа против „карамелите“ што е и очекувано и најавува реакција на тимот веќе во градското дерби против Манчестер Сити.

Играчот за врска на Манчестер Јунајтед Пол Погба порача дека тој и неговите соиграчи не покажале почит кон клубот и навивачите во катастрофалниот настап против Евертон на „Гудисон Парк“.

„Црвените ѓаволи“ направија чекор назад во борбата за место кое води во ЛШ, но се уште се во трката за четвртото место и пласманот во Лигата на шампионите.

„Би сакал да знам каде работата тргна во погрешна насока. Изгледавме како целосно друг тим. Тоа не е добро за Манчестер Јунајтед, клупската историја и навивачите. Ништо што направивме не беше добро. Поразот не е нешто што ни беше потребно за четвртото место. Да не биде дека не го почитувам Евертон, но начинот на кој игравме е непочитување. Не се почитувавме самите себе, клубот и навивачите“, изјави Погба.

Се би можело да биде брзо заборавено ако во среда слават во дербито на Манчестер.

„Најважно е да го промениме менталитетот на теренот. Не можеме да останеме во минатото со старите главоболки. Морате да размислувате за следниот натпревар, да играте и работите подобро. Во соблекувалната после натпреварот ги оставивме да зборуваат тренерите и стручниот штаб. И тие ни кажаа дека таквата игра на теренот прво е непочитување на себеси. Она што го одигравме не беше чесно кон соиграчите, стручниот штаб, луѓето во клубот, навивачите – кон сите. Поради нивната работа, тие ги оставаат своите животи за овој тим и клуб. Не им возвративме онака како што требеше поради тоа сме лути на себе“, порача Погба.