Нова идеја за Премиер лигата: Четири натпревари дневно на еден стадион?

Фудбалскиот сојуз на Англија го понуди „Вембли“ и својот тренинг-центар на раководството на Премиер лигата за да се заврши сезоната, пишува „Тајмс“.

Минатиот месец поради пандемијата од коронавирусот англиското фудбалско првенство беше прекинато и се уште не се знае кога ќе биде продолжено. „Тајмс“ тврди дека продолжување можеме да очекуваме во текот на летото.

„Во јуни или јули ќе се играат натпревари. Трибините би биле празни. Ако треба ќе се играат и четири натпревари дневно на Вембли“, изјавил извор близок на челниците за „Тајмс“.

Можно е секој клуб да мора да игра три натпревари неделно, а еден од плановите е сите натпревари да се играат во Лондон со цел да се ограничат патувањата и можноста за ширење на заразата. УЕФА очекува националните првенства да се завршат до август за да може да се завршат и европските натпреварувања, а потоа да почне и новата сезона.

Во моментот кога сезоната се прекина Ливерпул е убедливо прв со 25 бодови предност и потребни му се само уште шест бода за и математички да ја обезбеди титулата.