Непријатна сцена на Вимблдон: Новинарите се обидоа да го испровоцираат Рубљов поради војната во Украина

По поразот со 3:1 од Новак Ѓоковиќ во четвртфиналето на Вимблдон, Андреј Рубљов мораше да се соочи со непријатна ситуација на прес-конференцијата.

Рускиот тенисер е познат како некој кој од самиот почеток на војната меѓу Русија и Украина, јавно зазеде став дека не ја поддржува војната, а откако имаше голема поддршка од навивачите, изрази благодарност, велејќи дека „тој се чувствува посебно, особено ако се земе предвид од која земја доаѓа“.

И тоа поттикна еден локален новинар да му постави во најмала рака проблематично прашање:

„Дали се чувствувате виновни затоа што сте од Русија?

На тоа Рубљов одговори:

„Не, мислам… не знам што да кажам. Веќе имам дадено многу изјави на оваа тема, мислам дека е многу јасно што мислам, така што… Се работи за ситуација која е катастрофална, која никому не ја посакува. Сакам само да завршат сите овие ужасни работи и луѓето да имаат шанса за нормален живот“, изјави Рубљов.