Меси лут на бразилскиот судија: Секогаш ја прави истата работа

Аргентина вчера во натпревар од квалификациите за Светското првенство го победи Перу со 1:0.

Аргентинците во Буенос Аирес тешко, но сепак заслужено дојдоа до нова победа и се најдоа на чекор од обезбедување пласман на Мундијалот во Катар. Единствениот гол на натпреварот го постигна Лаутаро Мартинез, а Лионел Меси по мечот се пожали на судењето.

„Тежок натпревар денес. Немаше многу простор кој можеме да го искористиме, а играњето на ветер ни ги отежни работите. Овој судија секогаш кога ни суди ја прави истата работа. Можеби тоа го прави намерно. Во секој случај среќен сум за трите бода и што сме чекор поблиску до целта“, изјави Меси.

Судијата на натпреварот беше Бразилецот, Вилтон Переира Сампаио (39) и тој на Аргентина и судеше во јуни против Уругвај (1:0) и Еквадор (3:0) на Копа Америка. Скоро секогаш кога суди Аргентина победува, но Меси поради нешто е незадоволен.