Икарди од „само“ 60 милиони евра? Можно е!

Ситуацијата околу Мауро Икарди се уште не е целосно јасна.

Мауро Икарди се врати во тимот на Интер, Лучијано Спалети попушти под притисокот, но и понатаму договор за продолжување на соработката со клубот нема.

И пред да му биде одземена капитенската лента Икарди се поврзуваше со заминување од Интер, но тогаш за многу поголема сума отколку сега. Се пишуваше за 100-150 милиони евра, а сега Интер би можел да го продаде за многу помалку.

На Икарди поради одолговлекувањето со потпишувањето на договорот му беше одземена капитенската лента и таа беше доделена на голманот Самир Хандановиќ. Икарди се врати меѓутоа напредок во преговорите за новиот договор скоро и да нема никаков.

Поради таквата ситуација шпански „АС“ денес пишува дека Интер ќе биде приморан и ќе прифати да го продаде аргентинскиот напаѓач за сума од 60 милиони евра.

Доколку навистина Интер се одлучи толку да ја намали цената, прв кој ќе реагира веројатно ќе биде Реал Мадрид.

Икарди освен со Реал Мадрид во Италија многу се поврзуваше со трансфер во редовите на најголемиот ривал на Интер, Јувентус. Новинарот Танкреди Палмери пред нешто повеќе од еден месец тврдеше дури и дека Аргентинецот е во ваква ситуација затоа што постигнал договор со „старата дама“.

Секако, во Интер кога веќе би го продавале Икарди би сакале тоа да биде надвор од Италија.